अध्यक्षकाे कलमवाट……….. 
तत्कालिन गैंडाकोट गाविसमा रहेको गैंडाकोट युवा क्लबमा सक्रिय रहेका केही यूवा साथीहरुको सकृयतामा मेरो नेतृत्वमा २०५० साल कार्तिक १ गते गैंडाकोट युवा बचत तथा ऋण सहकारी संस्थाको नामबाट यस संस्थाको स्थापना भएको थियो ।
गैंडाकोट नगरपालिकालाई आफ्नो कार्यक्षेत्र निर्धारण गरेको यस संस्थाले आफ्ना सदस्यहरुलाई अझै प्रभावकारी र गुणस्तरीय सेवा प्रदान गर्ने उद्येश्यका साथ, छिमेकमा रहेका समान प्रकृतिका सहकारी संस्थाहरुसंग एकिकरण गर्ने अभियानमा लाग्दै गर्दा स्वाभिमान साकोस, आमा साकोस, नवल कृषि सहकारी संस्था, संगम अविरत साकोस, कलश साकोस संग एकिकरण गरी हाल गण्डकी बचत तथा ऋण सहकारी संस्थाको नामबाट संस्था संचालनमा छ । अमरापुरीमा पहिलो सेवा केन्द्र संचालन गरेको यस संस्थाले एकिकरण गर्दै जाँदा थप ५ वटा सेवाकेन्द्र सहित कुल ६ वटा सेवाकेन्द्र र एक मुख्य कार्यालय गरी ७ स्थानवाट समान कारोवार गर्दै आइरहेको छ । यसमध्ये संस्थाको मुख्य कार्यालय सहित ४ स्थानमा आफ्नै स्वामित्वमा रहेका कार्यालय भवनहरु छन् ।
समुदायको उत्कृष्ट वित्तीय सहकारी संस्थाको परिकल्पना अनुरुप हाल करीब १७ हजार शेयर सदस्यहरु ५००० बाल बचतकर्ता माझ २ अर्व १० करोड पूँजि परिचालन गरी बिभिन्न वित्तीय तथा गैर वित्तीय सेवाहरु प्रदान गर्दै आएको छ ।
“सदस्यको सन्तुष्टि हाम्रो प्रतिबद्धता”
हाल केहि सहकारी संस्थाहरूले आफ्नो मूल सिद्धान्त, मूल्य र मान्यताहरूलाई बेवास्ता गर्दा, उनीहरू अन्य बैंक तथा वित्तीय संस्था जस्तै बन्ने प्रयास गर्दा त्यस्ता केहि सहकारीहरुमा समस्या सिर्जना भएको देखिन्छ । सहकारीको मुख्य उद्देश्य समुदायको उत्थान र आपसी सहायतामा आधारित हुन्छ, तर जब यसलाई लाभको श्रोतको रुपमा मात्र हेर्ने दृष्टिकोणबाट चलाउन थालिन्छ तब समस्या उत्पन्न हुन्छ । सहकारीका सदस्यहरूले बचत फिर्ता पाउन नसक्दा उनीहरूले आन्दोलन गरिरहेका छन् जसले सहकारीको छवि झन बिगारेको छ । यसको समाधान भनेको सहकारीहरूले पारदर्शिता, जवाफदेहिता, र आपसी विश्वासमा आधारित प्रणाली निर्माण गर्नु हो ।गण्डकी साकोस जस्ता सदस्यमा आधारीत निति बिधि र प्रबिधिमा संचालन भैरहेका संस्थाहरुमा समेत नीति बिधि प्रबिधिमा पुनर्संरचना गर्ने, सहकारीको मौलिक सिद्धान्तलाई कायम राख्ने, सदस्यहरूलाई सचेत र प्रशिक्षित बनाउने , समयमै नियमन र अनुगमन गर्ने, कर्जाको प्रभावकारी व्यवस्थापन गर्ने, साझा जिम्मेवारी बहन गर्ने र सदस्यहरूलाई सुचना दिनेबारे विशेष ध्यान दिनुपर्छ । हामी गण्डकी साकोसका समग्र संचालक तथा ब्यबस्थापन समुह उपरोक्त विषयमा सचेत छ । गण्डकी साकोसले यिनै बिषयहरुलाई मध्यनजरमा राख्दै आफ्ना सदस्यहरुलाई प्रभावकारी गुणस्तरीय एवं सर्वसुलभ वित्तीय तथा गैर वित्तीय सेवा प्रदान गर्नका लागि निति बिधि र अत्याधुनिक प्रविधिहरु प्रयोगमा ल्याईएको छ । संस्था नीति विधि र प्रविधिमा चल्नको लागि ३७ प्रकारका नीति निर्देशिका र कार्यविधिहरु अद्यावद्यिक रहेका छन् । संस्थाले संस्था संचालनको लागि चार बर्षिय व्यवशायिक योजना तयार गरी सो योजनाले निर्धारण गरेका मापदण्ड अनुसार बार्षिक रुपमा समीक्षा तथा पुनरावलोकन गरी आफ्ना गतिविधिहरु संचालन गर्दै आएको छ ।
एसियालि ऋण महासंघ (अकू) द्वारा नेफ्स्कून मार्फत संचालित एक्सेस ब्राण्ड कार्यक्रममा सहभागी भई सन २०१७ देखि लगातार चार पटक एक्सेसको ब्रोन्ज (रजत) ब्राण्ड प्राप्त गरी सकेको छ भने हाल पनि सो कार्यक्रममा आवद्ध रहेको छ ।संस्थाका नियमित प्रशाशनिक गतिविधिहरु संचालक समितिले तर्जुमा गरेको निति बिधि प्रविधि बमोजिम व्यवस्थापन पक्षबाट संचालन हुने गरेको छ भने आफ्ना सदस्यहरुको लागि उपलब्ध वित्तीय तथा गैर वित्तीय सेवाहरु कसरी प्रभावकारी तवरले सुचारु गर्ने भन्ने विषयमा संचालक समिति एंव व्यवस्थापन समूह कृयाशिल रहेको छ ।
व्यवस्थापन पक्षलाई अझै प्रभावकारी बनाउन विभिन्न विभाग वनाइ विभागिय जिम्मेवारी समेत प्रदान गरिएको छ । आगामी दिनहरुमा अझै जिम्मेवारी वोधका साथ संस्था संचालनमा आफुलाई समर्पित गराउन संचालक समिति एंव व्यवस्थापन समूह प्रतिवद्ध रहेका कुरा स्मरण गराउन चाहन्छु । संचालक र व्यवस्थापनको संयुक्त पहलकदमीबाट “समुदायको उत्कृष्ट सहकारी संस्था” बनाउने संस्थाको परिकल्पनाले पूर्णता पाउने कुरामा हामी विश्वस्त छौं ।
